Düt es dei offizielln Internet Siete van Fabbenstie. Fabbenstie es äin Ortsdeil van dei Stadt Espelkamp un ligg mitten in den schönen Müelnkreis Min'n-Lübbke. Fabbenstie häv ungefähr 820 Inwuhners.
In Fabbenstie giv dat 'n reget Vereinsliäbn. Die gröttstn Vereine in'n Ore sin dei Sportverein VfB Fabbenstie un dei Schützenverein Fabbenstie. Ümme dei Vereinsaktivitäten biäter owereinanner to kriegen, wurde dei "Dorfgemeinschaft Fabbenstedt e.V." in't Liäbn roupen. Düsse Verein maket auk den Fabbenstieär Heimataumd. Dän giv dat seit 1981 jedet Johr in'n November.
Tou dei Besonnerhäiten van Fabbenstie tellt ok nau die bäiden lüttken Fabbenstiär Museen. Seit ungefähr 1999 giv et die Utstellung „Inkaupen vör füfftich Johrn“ in äin Niebngebäude van dei Auln Fabbenstieär Schoule, dei vandage ols Dorfgemeinschaftshus nutzt wett. Hier es wier upbouet, wat früer upn Lanne dotouhöörde, äin Dorpladen. Äigenlik sind et tweei Ladens, die in den Museumsraum üärn Platz kriägen hätt: die Kolonialwarenhandlung Carl Horstmann un dat Manufakturwarengeschäft Wilhelm Brune. Seit 2005 giv et in ein'n Klassenzimmer van dat Schoulgebäude äine Dauerutstellung „Aule Fabbenstiär Schoule“ met Schoulbänke, Kortnstänner un anneret Mobiliar sowie Zeugnissen, Klassenboikern, viäle oule Fotos un annere Ünnerlagen ut uover 200 Johre Fabbenstiär Schoulgeschichte.